I Torinetia 15.1-11
O TE MAITAI A TE ATUA IA U NEI RA
Taiòraa : I Torinetia 15.1-11
Ìrava faaitoitoraa : 10
"To ù nei rä huru e vai nei , no te here ia o te Atua , e te
maitaì na na i horoàhia mai ia ù nei , aore ia i riro ei mea faufaa òre , e òhipa rahi
hoì ta ù i rave i ta rätou atoà ra , eere rä vau , o te maitaì rä a te Atua i
ia ù nei ra" .
I roto i teie taiòraa i to tätou , na reira hoì to tätou ìrava tumu
, e piti tuhaa teie e vai nei , a tahi , te fäiraa hara , to na ia huru hou te täviniraa
i te Atua , e a piti , te fäìraa faaroo , to na ia huru i roto i te täviniraa i te Atua .
Ia hiò maitaì-anaè-hia , e piti teie parau e âpee noa i te taata , te mau huru taata atoà .
A tahi , te huru o te taata hou te täviniraa . No Pauro i roto i te ìrava 9 , te vai ra te tahi manaònaòraa e vai ra i roto ia na , terä rahiraa matahiti mai to na âpïraa mai ä e tae roa mai i nià i te èà no Tamateto , te èà no te tïtauraa , e te mea e tupu ra i roto ia na , te faufaa òre o to na taime , te faufaa òre o te òhipa o ta na i rave mai , e tei riro hoì mai te tahi maì ra no na , ta na a e parau ra e , "e òre hoì au e au ia parauhia e , e âpotetoro , no te mea , i hämani ìno na vau i te Ètärëtia o te Atua" .
E fäìraa hara teie na Pauro , to na ia faaìteraa i ta na mau hapa i mua i te Atua e i mua atoà hoì i to Törïnëtia , e te faufaa òre no te èà matamua o ta na i rave , no te mea , ua ö o na i roto i te hämani-ìno-raa taata . Ia hiò anaèhia , aita o na i hämani ìno noa i te Ètärëtia a te Metia , ua hâmani ìno atoà rä o ia i te Atua te tumu o te ètärëtia , te auraa , i roto i te èà matamua o ta na i rave , ua riro o na ei tumu i taupupu ai te tupuraa no te hinaaro o te Atua . Ta na ia e faaìte ra nä roto i te Fäìraa hara .
E a piti , to na ia huru i roto i te tâviniraa , oia hoì , to na huru i nià i te piti o te èà . Ta na ia e parau ra nä roto i te reo o to tätou ìrava e , To ù nei rä huru e vai nei , no te here ia o te Atua , e te maitaì na na i horoàhia mai ia ù nei , aore ia i riro ei mea faufaa òre , e òhipa rahi hoì ta ù i rave i ta rätou atoà ra , eere rä vau , o te maitaì rä a te Atua i ia ù nei ra .
Te òhipa ta Pauro e haapii mai ra ia tätou , to na ia haamoèraa ia na , to na haamoèraa i to na parau ei räveà e ìtehia ai to te tahi parau . I roto i te ìrava 8 , te na ô ra o Pauro i reira , "e te hopeà iho ra , ìtea atoà iho ra ia ù , mai te mea e , e mahemo vau" . Teie manaò i to Pauro , te mea atoà ia ta Ioane i faahiti i to na tau , te na ô ra Ioane e , "Etupu O ia i te rahiraa , e hoì rä vau i te itiraa" .
Te auraa no teie na manaò e piti, i roto i te täviniraa , eita te tävini e ìmi i te räveà ia ìtehia to na parau , e ìmi rä o na i te räveà ia ìtehia te parau o te Atua o ta na e tävini ra . Te auraa ia no terä manaò e , ia ìmi te mau tävini atoà i te räveà ia moè to na parau , e ia ìtehia to te Atua parau . Te mea atoà ia ta Pauro e parau ra e , e te hopeà iho ra , ìtea atoà iho ra ia ù , mai te mea e , e mahemo vau .
No tätou i teie ànotau , e ia au i te pororaa a Pauro i to na tau i teie Ètärëtia , i nià i te èà matamua i ravehia e Pauro , te haapii mai ra ia e , mea faufaa òre te reira èà , e püai faufaa òre i te mea , aita te reira püai i âpeehia e te here o te Atua . Te èà mea tano i te mau taata atoà ia rave , e èà ia o te täviniraa , i te mea , e âpee mäitehia te reira i te here o te Atua .
Te auraa , te feiä atoà tei hinaaro e tävini i te Atua ,
ia ìte ia e , eita te Atua e vai iho noa na òe anaè e rave i te òhipa , e tauturu
atoà mai rä te Atua , ta Pauro ia e haapäpü ra e , e òhipa rahi hoì ta ù i rave
i ta rätou atoà ra , eere rä vau , o te maitaì rä a te Atua i ia ù nei ra
.
Na te here e na te aroha o te Atua e tauturu i to na mau tâvini atoà i
te faaìteraa i to na parau e i to na hinaaro . Ta na ia e parau ra i te pae hopeà
o teie rata e , ia vai ä te aroha o t o tâtou Fatu ra o Ietu Metia . IA ORA NA.