I Torinetia 7.1-16
TE PARAU O TE FAAIPOIPORAA
Taiòraa : I Torinetia 7.1-16
Ìrava tumu : 7
"Te hinaaro nei au e mai ia ù atoà nei te huru o te taata atoà
. O ta te Atua rä i horoà mai i te taata atoà , o ta na ia , e huru ê to te tahi
, e huru ê hoì to te tahi" .
I mua i teie parau i to tätou , te hinaaro nei Pauro ia araaraa maitaì te parau no te faaipoiporaa i roto i te feiä atoà e hinaaro ra e faaö i roto i taua òhipa ra . Te riro atoà ra teie parau , ei tautururaa ia tätou i te märamaramaraa i te auraa mau i haamauhia ai te faaipoiporaa .
No Pauro , aita o na e haafaufaa roa ra i te faaipoiporaa , e märamarama atoà rä tätou i teie manaò i to Pauro i te mea , e Taanoa o ia , te auraa no teie parau Taanoa , o na iti anaè aita e hoa i roto i te oraraa , aore ia e parau tätou e , aita e vahine , e ia nä roto hoì i te manaò o te mäòhi ra , e taata ia aita e ama .
I faahiti ai rä o Pauro i te parau o te faaipoiporaa , no te mea ia te reira te tahi räveà ta na e ìte ra no te tïnairaa i te parau no te taiàta , te parau no te faaturi , ta Pauro ia e faahiti ra i roto i te mau ìrava matamua no teie taiòraa , tei na ô mai e , "I te mau parau ta òutou i päpaì mai ia ù nei , e mea maitaì ia i te taata nei eiaha e faaipoipo i te vahine , maori rä , ei faaòre i te taiàta..." .
A püòi mai ai o Pauro i teie parauraa e , Te hinaaro nei au e mai ia ù atoà nei te huru o te taata atoà . O ta te Atua rä i horoà mai i te taata atoà , o ta na ia , e huru ê to te tahi , e huru ê hoì to te tahi . Te auraa no teie manaò i to Pauro , te mea ia ta te tahi mau faaroo i haafaufaa , oia hoì , i mua i te täviniraa , i mua i te peeraa i te Fatu , mea maitaì ia òre te parau no te hoa ia riro ei tumu e fifi ai te täviniraa i te Atua , e hau roa atu i te reira , ua haapae roa i te vahine , e te vahine hoì , ua haapae roa ia i te täne .
Te auraa , te horoà ra o Pauro i te räveà no te feiä faaipoipo òre e tae noa atu i te feiä tei faaipoipo . No te feiä faaipoipo òre , te nä ô ra o Pauro , "teie ta ù parau i te feiä Taanoa e te mau ìvi ra , e mea maitaì ia rätou ia pärahi noa mai ia ù atoà nei" , te mea e ara i roto i teie parau i ta Pauro , aita o Pauro e faahepo nei i te taata ia òre ihoä e faaea i te vahine aore ra i te täne , ia òre rä te taata ia märamarama i te auraa o te faaipoiporaa , mea maitaì aè ia eiaha e faaipoipo .
No te mea te faaipoiporaa , eere i te taime a fiu ai te tahi i te tahi , e faataa ia , te haapäpü maitaì ra o Pauro i te ìrava 5 , "eiaha òrua e faataa ia òrua iho , maori rä , e vähi poto aè ia tià ia ôrua , ia noaa ta ôrua haapaeraa mäa e te pure , a tiààti faahou ai ôrua , ia òre Tatani ia haavare mai ia ôrua no te tià òre ia ôrua ia faaòromaì" .
Areà no te feiä tei faaipoipo , te na ô nei ia o Pauro , "e horoà te täne i te mea tià i te vahine , e na reira atoà te vahine i te tâne , eere hoì tei te vahine te parau i to na iho tino , tei te täne rä , mai te reira atoà to te täne , eere tei ia na te parau i to na iho tino , tei te vahine rä" .
E aha te auraa no teie manaò i to Pauro , eita e tano i te täne ia rave noa i te òhipa nä nià noa i to na manaò , na reira hoì te vahine , ia ara räua e toopiti räua i teie nei , e i roto i terä toopiti , ia roaa ia te hoê . E aha te auraa no teie parau , mai te metua , te tamaiti e te värua maitaì , e tootoru rätou , te auraa , e taa ê ihoä te Metua i te Tamaiti , na reira te Tamaiti i te Värua maitaì , i roto rä i terä taa-ê-raa , hoê ä manaò to rätou , aore ia , hoê ä fä e tähoê ra ia rätou , maoti rä , te ora ia .
Te auraa ia no teie ìrava i to tätou , Te hinaaro nei au e mai ia ù atoà nei te huru o te taata atoà . O ta te Atua rä i horoà mai i te taata atoà , o ta na ia , e huru ê to te tahi , e huru ê hoì to te tahi , te auraa , eita e tano i te taata e faahuru ê i ta te Atua i faanaho , ua faahuru ê anaè i ta te Atua , ua vahavaha ia e ua faahapa i te Atua . Mai te peu , te faahitihia ra i roto i te faufaa tahito , e tei faahiti faahouhia e Ietu i roto i te faufaa âpï e , e faaruè ai te taata i ta na metua täne e ta na metua vahine a àti atu ai i ta na vahine e e riro räua ei hoê , eiaha ia te taata e haapae i ta te Atua i horoà mai ia na , ia haapae anaè te taata i ta te Atua , o ta na te reira hara .
No reira no tätou i teie mahana , mea faufaa roa te faaipoiporaa , mea faufaa-roa-atu rä ia ìte i te auraa o te òhipa e ravehia ra . Te faaipoiporaa , o to te tahi ia horoàraa i te here i te tahi , na reira hoì te tahi i te tahi , te auraa ia no terä parau e , faaipoipo . Te faaipoiporaa , o to te tahi ia horoàraa i te ora e fänaòhia ra e ana i roto i te tahi , na reira hoì te tahi i te tahi .
Te reira te auraa no teie parau i to tätou i teie ruì . Aita teie parau i to tâtou e faahepo ra i te taata ia horo mata pö noa i roto i te faaipoiporaa , ia ìte rä te taata e hinaaro ra e faaipoipo , i muri aè i te faaipoiporaa , e täpura òhipa terä e tiaìhia mai ra . Te reira te mea faufaa i roto i te faaipoiporaa , i te faatupuraa i te here , ia ìtehia te ora ta te Atua haamaitaìraa no te taata .
Eiaha atoà tätou e vahavaha i te feiä Taanoa , no te mea e parau paari atoà to Taanoa , te na ô ra terä parau paari e , E Taanoa e , o òe anaè iho... IA ORA NA.