Ioane 3 : 14 - 21
Ioane 3 : 14 - 21
Ìrava tumu 19 VM : “Teie taua faahapa ra , o te märamarama , ua tae mai i te ao nei” .
Teie parau i to tätou i teie mahana , ua tupu ia na roto i te tahi tauà-parau-raa o Ietu e o Nïtötemo . O Nïtötemo , e tävana ia e , e òrometua no te âti-iuta , tei haere mai e faahapahapa ia Ietu i nià i te òhipa ta na e rave ra . I roto i te mau ìrava matamua no teie pene , te òhipa ta Nïtötemo e rave nei , e au ra ihoä i te ôfï , amoamo rii o na ia Ietu , i muri mai i reira e pätia ai . No te mea te na ô ra o Nïtötemo e , i te ìrava 2 , “Ua ìte mätou e , e òrometua òe , e mai ô mai òe i te Atua ra , e òre hoì teie mau täpaò ta òe e rave nei e tià i te taata ia rave , auaa te Atua atoà ra” .
Te auraa , te mohi ra o Nïtötemo i muri mai i to na paruparu e te pariraa i te Fatu e , e tià ihoä ia òe terä mau òhipa ia rave no te mea e tamaiti òe na te Atua . E ara i terä mau manaò i to Nïtötemo o te topa atoà tätou i roto i terä herepa i te parauraa e, mea òhie ihoä no Ietu i te mea e tamaiti na te Atua , e tià ihoä ia ia na i te rave i te mau mea naeà-òre-hia e te taata i te rave , ia haamanaò rä tätou i te tahi reo to te âpotetoro , te na ô mai ra ia , “ua faaère-roa-rä o ia ia na i to na tiàraa Atua , e ua rave i te huru o te tävini , no reira te Atua i faateitei roa ai ia na , e ua horoà i te iòa tei hau ê roa i te mau iòa atoà” , te auraa , e taata Ietu mai te mau taata atoà .
I mua i te reira parau i ta Nïtötemo , teie te reo o te Fatu , “ia òre te taata ia fänau faahou ra , e òre e ìte i te pätireia o e Atua” . O Nïtötemo i te märamaramaraa atu , te parau mai ra ia Ietu ia na e, e hoì faahou i roto i te ôpü o to na mämä . “E aha te taata paari e faanau ai , e ö faahou-änei-hoì i roto i te ôpü o ta na metua vahine a fânau mai ai” . Aita Ietu e parau ra ia Nïtötemo e, e hoì i roto i te ôpü o te taata , e faaruè rä i terä àpu tahito , e hoì i roto i te parau a te Atua . Ia òre ia faaruè i terä àpu tahito , e pohe .
Rave na tätou i te tahi hiòraa , ua ìte tätou i te tamarii i roto i te ôpü o to na mämä , te vai ra ihoä te tau i faataahia , ia fänauhia , oia hoì , faaruè i te àpu , vai iho i te püfenua no te haere mai i teie nei ao , ia òre anaè , e fifi terä tamarii i roto i te ôpü , e pohe . E ia fänauhia mai , aita ä rä i ravaì i reira , no te mea , te tiaì mai ra te tahi färii ia na , e taua färii ra , te parau ia a te Atua , na te parau a te Atua e haa-fänau-faahou i te taata , i reira e ìte ai i te Atua .
Ta Ietu ia e parau ra e, “ia òre te taata ia fänau i te pape e te värua , e òre o ia e ö i te pätïreia” . Te pape , o te parau ia a te Atua tei riro mai ei pape , na te parau a te Atua e haafänau-faahou i te taata , na te parau a te Atua e horoà i te tahi ora âpï i te taata , tauturuhia e te värua no te märamaramaraa i te hinaaro o te Atua , te reo ia o to tätou ìrava , Teie taua faahapa ra , o te märamarama , ua tae mai i te ao nei .
A püòi mai ai hoì Ietu i teie parauraa e, ta te tino e fânau ra e tino ia , e ta te Värua e fânau ra e värua ia , rahi-roa-atu ä te taa òre o Nïtötemo . Te auraa , e haapäpüraa teie na Ietu i te huru o te taata , ia parau anaèhia te tahi parau e faaea noa te taata i nià i te tino o te parau , aita rä e hiò ra i te värua o te parau , oia hoì , te auraa o te taò . Na te auraa o te taò e horoà mai i te märamarama . E ia hiò anaè hoì te taata i te värua o te taò , oia hoì te auraa no te manaò ta te taò e horoà mai ra , ta Ietu ia e parau mai ra i te ìrava 8 VH , “oia hoì , e taata atoà ta te Värua i fänau ra” .
Te auraa , e faaâpï te parau a te Atua i te taata . Aita tätou i ìte i te vähi no reira mai te parau a te Atua , aita atoà hoì tätou i ìte i te vähi ta na e arataì ra ia tätou , te faaroo ra rä e te ìte ra tätou i to na haruru , ta te Fatu ia e parau ra e, “te farara nei te mataì i ta na vähi i hinaaro ra , e te ìte ra òe i to na haruru , aita rä òe i ìte i te vähi no reira mai O ia ra , e te vähi e haerehia atu e a na ra” . O Ietu anaè tei ìte i te reira vähi , Aore roa e taata i tae i nià i te raì ,maori rä o tei haere mai i raro , mai nià mai i te raì ra , o te Tamaiti a te taata i nià i te raì ra . Teie taua faahapa ra , o te märamarama , ua tae mai i te ao nei
I roto i te ìrava 17 , te haapäpü ra Ietu e, “aore roa hoì te Atua i tono mai i ta na Tamaiti i te ao nei e faahapa mai i to te ao , ia ora rä to te ao ia na” . E to tätou hoì ìrava te na ô mai ra ia e, Teie taua faahapa ra , o te märamarama , ua tae mai i te ao nei . Eita e òre tätou i te uiui e, aita atu ra hoì e tüàtiraa faahou te parau a te Fatu , i naha te na ô mai ra e , aita te Atua i to na mai ia na no te faahapa , e te parau mai ra e, teie taua faahapa ra .
Eiaha tätou ia riro mai ia Nïtötemo ra te huru , i te faaea noa i nià i te taò , aita rä e hiò ra i te auraa e te manaò ta te taò e horoà mai ra . I naha hoì , ia parau anaè tätou e , ua faahapahia te tahi taata e te ture , te auraa ta tätou i tâpeà noa mai , ua faautuàhia ia , aita Ietu i haere mai no te faautuà i te taata , aita te reira tuhaa i horoàhia ia na , ua haere mai rä o na no te faaora i te taata , no te ìriti i te ùputa o te àau o te taata ia märamarama e ia fârii i te ora .
Te mea ta Ietu e hinaaro ra ia hau , aore ia ia rahi i roto i te taata , ia mâramarama ia i te hinaaro o te Atua , te reira te faahaparaa nehenehe roa aè , ia òhipa te taata e ia rahi roa atu ä te tupuraa no te märamarama i roto ia na . Te auraa no to tätou ìrava , Teie taua faahapa ra , o te märamarama , ua tae mai i te ao nei , te auraa , mai te peu ua âfaìhia mai te mâramarama i te taata ra , ia fârii ia te taata i te parau a te Atua , e na te parau a te Atua e horoà i te märamarama , eere änei te reira atoà te pehepeheraa a te päpaì taramo , E tiàrama ta òe parau i to ù nei âvaè , ei mörï no to ù nei mau haereà .
Faaea ia tätou i te tïtauraa ia märamarama i te mau parau àro o te raì , no te mea , te na ô mai ra Ietu e, teie hoì au e parau atu nei i te mau parau o teie nei ao , e aita òutou i märamarama , na hea ia òutou e märamarama ai , ia parau atu vau ia òutou i te mau parau o te raì .