Ioane 15.22 - 16.4

        

TE PIIHAI IHO TE ATUA IA TATOU




Taiòraa : Ioane 15.22 - 16.4

        




Ìrava  tumu : 27 


"E  e  faaìte-atoà-hoì  òutou  no  te  mea , i  pihaì-atoà-iho  òutou  ia  ù  nei  mai  te  matamua  mai  ä" .

         Ta tätou parau no teie faraite  ôroà , tei roto ia i te mau parau hopeà ta te Fatu i parau i ta na mau pipi hou o ia a vaiho mai ai ia rätou no te haere tià atu i te ao o to na metua.Te faaara ra te Fatu i ta na mau pipi i te mau fifi e rave rahi o ta rätou e farerei atu . Eita e òre  e , ua ìte te Fatu e te pärahi ra ta na mau pipi i roto i te hepohepo no teie vaihoraa no na ia rätou . A taa noa atu ai te mau fifi e farerei hia atu ,te vai atoà ra teie vaihoraa mai  to  te  Fatu  ia  rätou .O vai ia taata eita e hepohepo . Eita ihoa e òre no tätou ,te riro nei te taa-ê-raa o te tahi taata faufaa roa ia tätou mai te tahi òhipa teimaha roa . Hau roa atu teie ,te Fatu iho terä e vaiho ra i ta na mau pipi . I te rahiraa o te taime,te manaò noa ra tätou e aita ta tätou e raveà.

         E ìnaha e rave rahi mau haapììraa ta te Fatu i tuu i roto i te mau pipi . E rave rahi atoà mau òhipa ta te Fatu i faaìte ia rätou . Ta  tätou  ia  e tiàturi nei e , aita teie taa-ê-raa to te Fatu e riro ra ei raveà na na no te faatamarìì i ta na mau pipi.Te riro ra teie taa-ê-raa ei raveà e taata paari ai te mau pipi oia hoì , i reira rätou e faaea ai i te türuì noa i nià i te Fatu . I reira atoà rätou e ìmi ai i te mau raveà atoà i roto i ta rätou faaìteraa . I reira mau rätou e ìte ai i te faufaa no te mau haapììraa,te mau òhipa ta te Fatu i faaìte ia rätou e teie taaêraa no na ia rätou.

         Hau roa atu ,teie te tahi parau faufaa roa ta te Fatu e parau ra ia rätou :" E  e  faaìte-atoà-hoì  òutou  no  te  mea , i  pihaì-atoà-iho  òutou  ia  ù  nei  mai  te  matamua  mai  ä .I mua i te mau parau ta te Fatu i faaara i te mau pipi mai te mau fifi o ta rätou e farerei atu e tae noa atu i teie taa-ê-raa no na ia rätou, te riro nei teie parau  i  ta  te  Fatu  ei parau òaòa e ei parau te faaitoito ia rätou. Ia hiò anaè tätou i te huru o te Fatu i nià i ta na mau pipi ,e ìte tätou i to na manaònaò rahi ia rätou.Aita o ia e vaiho òtare nei ia rätou i roto i teie haereraa no na .

         Ua tià roa ia na te  tamaiti Atua tei parau e " O vau te èà ,te parau mau e te ora"i te farìì ma te haehaa o te âau e ua oti ta na tuhaa.I teie nei te haere nei o ia i te metua ra, na te  tahi  rä  e  haere  mai  e  tauturu  ia  rätou , ta  Ietu  ia  e  faahiti  ra  i  roto  i  te  ìrava  13  no  te  pene  15 , te  parau  ia  no  te varua , te  auraa , te  Värua  faaò  atu ra  te tauturu i te mau pipi i roto i ta rätou mau òhipa.

         Teie varua ta te Fatu e parau ra,eere ia te tahi varua ò na anaè to na faanahoraa . No te mea te mau parau ta na e faaìte mai i te mau pipi,eere ia e mau parau na na e mau parau ra tei horoàhia mai ia na.Te auraa ,te vaira te tüàtiraa i rotopü  te Atua metua e teie varua .I faaara ai te Fatu i te parau o te varua  ,e täpaò faaìte e ua horoà hia te reira ìte i roto ia na.Eita tätou e hape,ia parau tätou e te vai ra te tüàtiraa i rotopü i te Atua Metua ,te varua  e te Atua Tamaiti.

         I roto i te faaararaa a te Fatu no te varua ,te haapäpü ra o ia e varua  parau mau.Te auraa ,aita te parau no te parau mau i horoà noa hia i te Fatu,ua fanaò atoà te varua  i te reira.Te ìte atoà ra tätou ,e ia haere anaè te Fatu i te Atua Metua ra na te varua  ia tauturu i te mau pipi i roto i ta rätou òhiparaa.

         E piti tuhaa ta te varua  e rave:

- a tahi: te arataìraa i te mau pipi i roto i te täatoàraa o te parau mau.

- a piti: te faaìteraa i te mau pipi i te mau òhipa e tupu a muri aè.

         E tuhaa arataì ta te varua . Te auraa, e âfaì o ia i te mau pipi na nià i te èà e päpü ai ta rätou faaìteraa i te mau òhipa atoà o ta rätou i ora mai na na muri i te Fatu. E haere noa mai te varua  no te haapäpü i te mau pipi i te mau òhipa e te mau parau i faaìtehia mai e Ietu. Te ìte ra ia tätou i te tuhaa a te varua , eere ia i te tahi òhipa taaê roa i ta te Fatu, e püòiraa ra no te òhipa i ravehia mai e Ietu.

         Te  auraa , te tiàturi nei tätou e ua ìte te mau pipi i te tauturu rahi a te varua . E päpü   atoà ia tätou e, e iti mai terä hepohepo to rätou e òre roa atu. Na roto i te parau a te Fatu o ta tätou i hiò mai, eere e ua ara tätou i te parau o te varua . Ìnaha hoì , i  te hoperaa atu ta te Fatu i haamata ai te varua  i ta na. Te auraa, ua faaìte mai te Atua i to na aroha ia tätou na roto i te tonoraa mai i ta na tamaiti. E te haereraa mai no te varua  tei faaarahia e Ietu, ua riro atoà ei täpaò no te aroha o te Atua. 

         No  tätou  i  teie  mahana , te  ani  atoà  mai  ra  te  Fatu  ia  tätou  e , "E  e  faaìte-atoà-hoì  tätou  no  te  mea , i  pihaì-atoà-iho  tätou  ia  na  mai  te  matamua  mai  ä" , e  te  vai  ra  to  tätou  tauturu  fätata  roa , maoti  rä , te  Värua  faaò  ia . Ia  tauturu  mai  ä , e  ia  faaitoito  mai  ä  te  Fatu  i  to  na  mau  tävini  i  te  faaìteraa  i  to  na  hinaaro . Ia  ora  na .